Градоначалникот на Охрид Никола Бакрачески и амбасадорката на Р. Германија во Р. Македонија, Кристине Д. Алтхаузер, денес официјално го ставија во употреба реконструираното и проширено детско игралиште кај каналот „Студенчишта“. Станува збор за проект што општината го реализираше со поддршка на германската амбасада за што доби гранд во износ од околу 8. 000 евра.
– Со овие средства се набавија реквизитите и играчките додека општина Охрид учествуваше во делот на целосно уредување на подлогата за конечно игралиштето да го добие овој изглед којшто го има денес- рече градоначалникот Никола Бакрачески посочувајќи дека тоа е само дел од напорите на општината да се разубави животот на најмладата генерација.
–Токму затоа што децата ги истражуваат своите имагинации кои се особено важни за нивниот развој во здрава и креативна личност ние стануваме се поиновативни и настојуваме секое игралиште да го дооплемениме и збогатиме со нови содржини како и да отвораме нови игралишта. Тоа го правиме во континуитет. Претходно беа отворени неколку игралишта во Охрид ова е едно во низата. Тука нема да застанеме нашата програма за сестран детски развој и уредување на ваквите катчиња продолжува во иднина. Остануваме посветени на нашата заложба за изградба на неколку десеттини игралишта и за деца и за возрасни– додаде градоначалникот Бакрачески.
Амбасадорката на Р. Германија во Р. Македонија Кристине Д. Алтхаузер се заблагодари на Општината и Градоначалникот за успешната реализација на проектот.
–Ние од германската амбасада посебно се радуваме што одлучивме да го реализираме токму овој проект. Ова не е прв проект којшто сме го реализирале преку малите проекти на амбасадата. Можам да кажам дека со Охрид сме имале секогаш добра соработка и ние како амбасада учествуваме секогаш во изборот на проектите. Имаме повеќе критериуми. Еден од нив е одржливост, треба да биде бенефит за младата генерација, за луѓето коишто живеат тука и можам да кажам дека проектот во Охрид ги исполни сите критериуми кои ние како амбасада ги задаваме– изјави амбасадорката Алтхаузер.
Игралиштето кај каналот „Студенчишта“ е изградено во 2005 година со донација на ТЕЛЕКОМ и ова е негова прва реконструкција од тогаш а за неговата безбедност и одржување ќе се грижи ЈП „Билјанилни Извори“
Со поддршка на германската амбасада општина Охрид ги реконструира и каптажите во село Куратица. Изминатиов период општина Охрид во континуитет со свои проекти аплицира и добива финансиска поддршка од амбасади во државава.
