По повод одбележувањето на манифестацијата „Прличеви беседи“, делегација на општина Охрид предводена од градоначалникот Никола Бакрачески положи цвеќе пред бистата на поетот пред Библиотеката „Григор Прличев“.
Цвеќе положија и делегации од институциите што го носат името на Прличев, Библиотеката , Центарот за култура и Основното училиште како и претставници на политичките партии.
Градоначалникот Бакрачески присуствуваше и на традиционалната визита во НУ Библиотека „Григор Прличев“ во чии рамки беседа за поетот одржа Јован Стрезоски член на Друштвото на Писатели на Македонија.
Во рамки на празнувањата вечерва во Центарот за Култура ќе се одржи свечена приредба по повод патрониот празник на ОУ „Григор Прличев“.
Чествувањата за празникот продолжуваат утре. Во организација на општина Охрид во 11:30 часот е предвидена панихида и полагање свежо цвеќе на гробот на Прличев .Веднаш потоа во неговата спомен куќа пригодно обраќање ќе има градоначалникот Никола Бакрачески кој ќе ги врачи наградите на прво наградените ученици на литературниот конкурс распишан од ОУ „Григор Прличев“. Пригодна реч за поетот ќе одржи и проф. д-р Георги Сталев Поповски.
