На барање на премиерот Заев Собранието ѝ изгласа доверба на Владата: Побаравме доверба за да ги разобличиме блокадите кои го запираат напредокот и ја кочат правдата
Собранието на Република Северна Македонија денеска изгласа доверба за Владата со мнозинство од 62 пратеници откако премиерот Зоран Заев се повика на член 93 став 1 од Уставот кој што вели Владата има право да постави прашање за доверба пред Собранието, како и на член 217 став 2 од деловникот на работа на парламентот.
„Ред е да се соочиме и да расчистиме, да го видиме на дело тоа толку многу најавувано наводно мнозинство од опозицијата кое наводно ќе ја падне оваа Влада. Ова е моментот кога ќе им покажеме на граѓаните колку има вистина во зборовите на опозицијата. Ова е моментот да видиме за што всушност станува збор, за стабилна власт со стабилно парламентарно мнозинство или за разнишана опозиција. Мора да е едното од двете, ако не и двете заедно“, истакна претседателот на Владата Заев во барањето да се гласа за доверба на Владата.
Примерот Заев нагласи дека заедно со сите обиди за опструкции и блокади од лидерството на ВМРО-ДПМНЕ, граѓаните секој ден се изложени на лажни вести и дезинформации за некакво ново непостоечко мнозинство, за некоја нова нестабилност и дека тоа се прави само поради внатрепартиски цели во ВМРО-ДПМНЕ.
„Упорно се пласираат лаги со цел да се создаде перцепција на несигурност кај граѓаните, на неизвесност за економијата. Сепак, како и секогаш, вистината е најсилното оружје против лагите, лажните вести и невистините. Парламентарното мнозинство, јас, Владата и коалицијата нема да дозволиме неизвесност, несигурност, сопки, блокади и опструкции. Во име на сето претходно кажано, во име на вистината ја преземам одговорноста и обврската пред граѓаните согласно член 93 став 1 од Уставот и член 217 став 2 од деловникот на Собранието да побарам изјаснување на Собранието за доверба на Владата“, потенцираше премиерот Заев во завршницата на својот предлог за гласањето доверба на Владата да биде ставено на дневен ред на седницата на Собранието.
Непосредно пред гласањето, претседателот на Владата Заев од собраниската говорница детално ги образложи причините за ова негово барање.
Обраќањето на премиерот ви го пренесуваме во целост:
„Како што претходно реков, денеска одлучив да излезам пред вас пратениците во македонскиот парламент и да се повикам на ставот 1 од членот 93 од Уставот и на ставот 2 од членот 217 од деловникот за работа на Собранието и да побарам од вас пратениците од Собранието да гласате за доверба на Владата.
Ставот 2 од членот 217 од деловникот за работа на Собранието ми овозможува да ви се обратам и да ви ги образложам причините и аргументите зошто го преземам овој чекор.
Но, претходно дозволете да објаснам за храброста за која што ме повика опозицијата преку процедуралните прашања. Членот 217 став 2 ја дава можноста на претседателот на Владата да побара барање за доверба на Владата и вели „во случај кога прашањето за доверба на Владата го поставува претседателот на Владата усно на седница на Собранието, Собранието гласа за доверба на Владата на истата седница без расправа“, и да точно е дека јас сум прв премиер кој што бара доверба на Владата од самостојноста на нашата држава, и да точно е дека тоа е и храброст, но и одговорност, решителност и апсолутно грижа за институциите, за граѓаните, за економијата и за стопанството.
Шест месеци како ја добив честа да ја водам оваа Влада, 6 месеци опозицијата вели дека оваа Влада ќе ја срушат, ќе падне дека нема да има доверба. Веќе има 3-4 месеци како најавуваат недоверба на Владата, постапки за недоверба на Владата, гласање за недоверба на Владата за да денеска дури и не бидат овде присутни кога јас го отворам прашањето за доверба на Владата.
Затоа, еве денеска одлучив јас да излезам пред вас и да се повикам на член 93 став 1 од Уставот и на став 2 од Членот 217 од Деловникот за работа на Собранието и да побарам од вас, пратениците во Собранието, да гласате за доверба на Владата.
Овој член ми овозможува да ви се обратам по тој повод и јас низ моето обраќање ќе ви ги образложам причините и аргументите зошто го преземам овој чекор.
Граѓаните на нашата земја на изборите на 15 јули минатата година го направија својот избор. Овој избор и гласот на граѓаните беа против блокадите, против обидите да се закочи правдата, да се запре напредокот, против обидите за враќање назад.
Врз основа на овие принципи и довербата на граѓаните беше формирано мнозинството, а со тоа и избран актуелниот состав на Владата кој беше изгласан со потребниот број гласови на пратениците.
Со оваа моја постапка денеска, еве ме, застанувам пред вас, и во име на целата Влада, во име на сите министри и коалициони партнери ја преземам одговорноста и ви давам можност да се изјасните и да гласате за доверба на Владата.
Ред е да се соочиме и да расчистиме: Да го видиме на дело тоа толку најавувано наводно мнозинство од опозицијата кое, наводно, ќе ја падне оваа Влада.
Да и дадеме на јавноста шанса да види колку се празни овие зборови и дека се искажуваат со единствена цел да создаваат лажна слика за силата на опозицијата и за наводната разнишаност на владината коалиција.
Или, пак, ќе се види дека владејачкото мнозинство е стабилно и со тенденција да се зголемува во наредниот период.
Денес ќе се види дека оваа владина коалиција оди и чекор понатаму во практикувањето на демократијата и нема ништо против пратениците од помалите политички партии на нашата коалиција да го користат легитимното право да делуваат самостојно во парламентот.
Тоа е моќта на слободата на делување на коалиционите партнери чија водилка е напредокот на земјата, а не партискиот рејтинг.
Ние не сме и никогаш нема да бидеме партија која мнозинството во Собранието и стабилноста на Владата го обезбедува со меници издадени од Груевски.
Не ни требаат меници за да ја обезбедиме стабилноста на владината коалиција и да ја водиме татковина кон прогрес, во друштвото на најнапредните западно-европски демократии.
Нашата единствена меница е довербата на граѓаните на изборите и владината програма со силна политичка волја за континуитет во спроведувањето на заеднички прифатените стратешки приоритети на нашата земја.
Паралелно со спроведувањето на здравствената стратегија за ефикасно справување со КОВИД-19 се работеше и се подготвија четвртиот и петтиот пакет економски мерки со цел одржливост на економијата, спас на работните места и грижа за никој да не биде изоставен.
Во инклузивен процес, со консултација на сите засегнати страни насочивме околу 1 милијарда и 300 милиони евра кон граѓаните и стопанството за да обезбедиме стабилна одржливост на економијата со потенцијал за ревитализација.
Инициравме процеси во енергетиката и енергетската ефикасност и активиравме тренд на преминување кон извори на чиста енергија и на сигурно снабдување со гас за македонската гасоводна мрежа чија градба е во напредна фаза. Почна реализација на фотоволтаичните централи.
Водени од најнепосредната грижа за граѓаните ја завршивме постапката со ТАВ за пренамена на 35 милиони евра за 99 проекти за 75 општини.
Како одговорни политичари, но пред сѐ како граѓани, се обврзуваме на силна, бескомпромисна борба за заштита на животната средина со 70 милиони евра еколошки чистиот и брз автобуски систем во Скопје. Ги прогласивме Осоговските Планини за заштитен предел. Во тек е и прогласување на дел од Водно за заштитено подрачје, а вчера го предадовме во Собранието Законот за прогласување на дел од Шар Планина за заштитено подрачје.
Најавивме и влеговме во време на прочистување на судството и неселективно владеење на правото.
Паднаа првите пресуди за најтешките дела за злосторничко здружување против државата и граѓаните. Процеси со правна разрешница кои поминаа низ независни, ефикасни, транспарентни и законски судски рочишта.
Започна пописот како чиста статистичка операција од чии показатели ќе произлезат насоките за некои од најзначајните прашања за идниот стратешки развој на земјата.
Од оваа година Северна Македонија слави една година од членството во НАТО со уште едно одличје на кое пишува – „Ние сме НАТО. Заедно сме посилни“.
Како Македонци и со нашиот македонски јазик ќе бидеме и членка на ЕУ.
И сето тоа го постигнавме наспроти сите опструкции, блокади и пречки на најголемата опозициска партија.
Како и во 2019, така и во 2020, а гледам дека истото го прават и во оваа година. ВМРО-ДПМНЕ ќе остане запаметена по тоа што беше најголемиот кочничар на реформите, мерките и политики што се во интерес на граѓаните.
За нив беше траума помислата за правда и правна држава и со сите сили ги блокираа и одолговлекуваа пакетот реформски закони во правосудството.
Сега блокираат низа измени на закони од кои зависи спроведувањето на мерките од петтиот ковид пакет наменет за граѓаните и за стопанството.
Беа и против покачувањето на минималната плата и решавањето на статусот на дополнителен број стечајци. Против една изборна единица, затоа што се плашат од гласот на граѓаните.
Сите сили ги спрегнаа за да го спречат донесувањето на Законот за попис и со стотици или илјадници амандмани во Собранието ги блокираат Законот за административни службеници, Законот за високо образование, Законот за внатрешни работи, Законот за работни односи, измените и дополнувањата на Законот за здравствена заштита, Законот за културно наследство и Законот за јавен интерес во културата, Законот за инвестиции за енергетска ефикасност, Законот за инвестиции во земјоделството и многу други.
Сите овие закони се од исклучително значење за граѓаните, а опозицијата блокира.
Блокиран е Законот за Клинички центар, а нашата понуда е ајде заедно да го донесеме. Со директно учество на пратеници или претставници во опозицијата во процесот на реализација на овој огромен капитален проект од највисоко значење на граѓаните.
Работата на пратениците, на македонското Собрание, мора да биде во насока на интересот на граѓаните, на државата.
Недозволиво е да не се закажуваат собраниски комисии кои ги води опозицијата, да се поднесуваат илјадници амандмани за важни закони, да не се дозволува работа онлајн во време на пандемијата.
Сето ова е дел од едно деструктивно однесување за да се блокира државата, но ова сценарио не успева.
Паралелно со овие обиди за опструкции и блокади граѓаните се секој ден изложени на лажни вести и дезинформации за некакво ново лажно мнозинство, на некоја нова лажна нестабилност и што ли уште не.
Само поради внатрепартиски цели, упорно се пласираат со цел да се создава перцепција на несигурност кај граѓаните, на неизвесност за севкупната економија.
Сепак, како и секогаш, вистината е најсилното оружје против лажните вести и невистините.
Ние немаме намера да се занимаваме со овие невистини, но нема да дозволиме неизвесност, несигурност, сопки, блокади и опструкции.
Во име не сето претходно кажано, во име на вистината, јас ја преземам, одговорноста и обврската пред граѓаните, согласно член 93 од Уставот и член 217 став 2 од Деловникот, да побарам изјаснување на Собранието за доверба на Владата.
Да ја расчистиме маглата и да се соочиме со реалноста.“
